مرافعة صلاح جاهين
[ندعوك للتسجيل في المنتدى أو التعريف بنفسك لمعاينة هذه الصورة] حلمت الليلادى بانى فى موقف رهيب
بقول والكلام طالع منى نحيب
اسيادى القضاه دفاعى بسيط
كلامى مهواش غويط ولا عبيط
بسيط
بساطة هدوم الغلابه الفقارى الحفاه
بسيط
زى اسم صديق على شفايف صديق
بسيط
زى دمعة بريئ
بسيط
زى وحش جعان فى الخلا
بسيط
زى حفنة دقيق
سيادى القضاه
يا زمم يا همم يا قمم يا عتاه
دفاعى قوى قوى زى صرخة غريق
ينادى لقارب نجاه
ينادى باخر قواه
دفاعى قوى زى الحديد
قوى زى نظرة وعيد
قوى زى تمثال
قوى زى بلطة رجال الحريق
فوق جبال الحريق
سيادى القضاه
سيادى الكرام الفخام العظام العلاه
دفاعى مؤيد
مؤيد بكل الكلام العظيم
بتوراه بانجيل بمزامير داود بالقرآن العظيم
دفاعى مؤيد بكل حفيف النسيم
بتهنينة الامهات للعيال فى المهود
بقولة بحبك يا بلدى بكل ابتسامة بحق وحقيق
أؤيد دفاعى وبرفع صباعى الضعيف واقول كلمتى
سيادى القضاه
سيادى الحدادى اللى حايمة على جتتى هقول كلمتى
بس قبل ما انطق واقول كلمتى قولولى انتو ايه تهمتى ايه تهمتى
الرئيسية 
