مشكلة الشباب المصري
احنا قولنا لازم نعمل حصر للمشاكل بتاعت شباب مصر علشان نحاول نحلها
اول حاجه جت فى بالنا مشكله البطاله
وبعدين لقينا حاجه بتقولنا تعالوا هنا
انتوا هتنسوا مشكله الشقه
شويه ولقينا حاجه بتقولنا ياااااااااااه
افتكرتوا البطاله والشقه ونسيتوا التعليم
قولنا لا كده الموضوع كبر ومحتاج كوبايه شاى كمان علشان نصحصح كده
بطاله ..شقه..تعليم..ادمان..انعدام قدوه...هيافه ...جواز عرفى...كفايه علينا دول دلؤتى
نحلهم ازاى بقى !
طيب فكروا معانا شويه ....فكروا تانى كده ...طيب نرجع نجيب الموضوع من اوله
مين هما الشباب؟؟؟
الشباب هما عماد الوطن
طيب متيجوا نشوف ايه الى اتربوا عليه
من اول ما اتولدنا تلقى ابوك او والدتك بيقلولك ..متتكلمش يا حماده فى السياسه...ملكش دعوه بلعيال الى بتعمل مظاهرات ... خلى بالك من المخبرين مالين الدنيا ...ملكاش دعوه بلاحزاب...وطلع حماده جاهل بلسياسه بمعنى كامل
لكن العيب مش فى حماده العيب فى الى رباه
خدوا عندكوا كمان
اتهامات من كل ناحيه
شباب هايف..مبيعملش حاجه... معندوش طموح.. بعيد عن الدين... معندوش وطنيه..
طبعا بعد الاتهامات دى حماده هيجيله عقده نفسيه
خلاص يا حماده متزعلش كده
احنا قررنا اننا نرد على الاتهامات دى كلها
1-شباب هايف ليه..علشان بيسمع موسيقى مختلفه..ولا علشان مصطلحات بنقولها علشان نهرب من واقع عايشينه.
ولا علشان دكتور شغال سواق على تاكسى ..هايف لما مشاركش فى السياسه الديموقراطيه الى عندنا دى ديكتاتوريه مقنعه عملوها الى قبلنا
هايف علشان قاعد على النت 24ساعه بيدور على علاقه حب مش لاقيها فى البيت ولا فى المجتمع
طيب والنبى بصوا على افلام زمان كانت مشاكلها كلها واحد وواحده وجواز عتريس من فؤاده باطل
2-الشباب معندوش دين؟؟ تفتكر !! طيب انزل كده وانت بتصلى وشوف عدد الشباب قد ايه فى المسجد وافتكر
يا ابو حماده لما كنت فى سن الشباب لما كنت بتروح تصلى يا ترى مين من الشباب كان بيدخل الجامع على ايامك
اتفرج على حفله لام كلثوم (بتاعت المنديل) وشوف كده كام واحده محجبه بلاش محجبه شوف كام واحده مش لبسه فوق الركبه... وشوف دلؤتى البنات بقى الحجاب بلنسبانا شى طبيعى الحمد لله
3-الشباب معندوش وطنيه .. والله شباب مصر لسه فيهم الخير وخير كبير جدا واعرفهم فى وقت الشده
اعرفهم فى العسكرى المصرى الى راعب اليهود على الحدود اعرفهم فى المظاهرات
فاكر يا ابو حماده لما كنت بتقول نموت نموت ونحى الوطن واول ما يطب الانجليز كنت بتقول ايه لف وارجع تانى
واخيرا يا ابو حماده انا بقولك حاول تفهم الشباب صح وخد بالك لو حصل حاجه لمصر مش هينقذك غير حماده والى زيه
عرفتوا يا جماعه ايه هى مشكله الشباب
ان الشباب نفسهم مش عارفين قيمتهم وبيستسلموا لامر الواقع والاتهامات الموجهه ليهم
معلش يا جماعه طولنا عليكوا لكن يارب تكون وجهه نظرنا قدرنا نوضحها وتوصلكوا الفكره
الرئيسية 
