ابا العمدة مات يارجالة

ألحقوا يابلد.........ألحقوا يا بلد


ألحقوا يابلد.........ألحقوا يا بلد...........أبا العمدة مات ........
بيجرى الواد الفقى العبيط فى البلد وهو بيزيع الخبر أبا العمدة ..........حسنين مبروك مات
كل اللى يسمع الخبر بيجيله حالة من الذهول..........محدش مصدق انه مات ده من ثوابت البلد..........البلد فيها ترعة.......وفيها حسنين مبروك وفيها وابور طحين ............ .....وبرضه فيها حسنين مبروك البلد بتزرع قمح وقطن............ ..ودول بتوع حسنين مبروك أما بقى البهايم والبرسيم والتبن العلف...........دول بتوع حسنين مبروك برضه حتى الناس اللى فى البلد بتوع حسنين مبروك ............ .
حسنين مبروك مسيطر ومهيمن على كل شبر فى البلد....وكل بهيمة او معزة سارحة ..أو شوية غلة رايحة وابرو الطحين ....
حسنين مبروك ورجالته بيتحكموا فى البلد كلها .........

فجأة كدة يصحوا اهل البلد الصبحية يلاقوا حسنين مبروك مات............صعبة دى

خرج اهل البلد للشوارع............ ...محدش مصدق ولا حد دارى باللى حواليه ناس بتبكى وناس مذهولة وناس بتضحك بدون سبب
محدش بيحبه............ ..ولا بيطيقه أصلاً

بس هو بالنسبة لأهل البلد.........كبيرهم وصغيرهم.........أبا الحاج......أبا العمدة....أبوهم يعنى حتى اللى أكبر منه والل فى سنه...........دايماً حاسين أنه أبوهم
سارقهم وناهبهم وواكل عرقهم...........بس أبوهم ............
ياترى ح يسيبهم لمين من عصابته
ح يسيبهم للواد أبنه بتاع المسخرة ...........ولا لمراته القرشانة اللى جاية من البندر تنهب فى بلدهم هى وعيالها ............ .

ولا ح يسيبهم لشيخ الغفر حسن الطهطاوى اللى مالوش عازة ..
ولا لشيخ البلد عامر سليم........اللى مية من تحت تبن.....ومحدش يعرف له قرار .......

البلد محتارة والأشعات بتطلع............ ...ومحدش مصدق الفقى العبيط وكله بيضرب كف على كف...........

قعد راجل كبارة فى البلد على المصطبة ولم حواليه كبارات البلد يتكلموا........ياترى ايه اللى جاى بعد مبروك .....

اول ماتكلم الراجل قال :
أحنا كلنا لا بنحبه ولا بنطيقه.........وكلنا حاطين البلغ القديمة فى حنكنا ومحدش قادر يتنفس....بس برضه هو كان ماسك البلد مسكة صح بيسرق أه....بينهب جداً......بيفترى أوى.....ماعندهوش رحمة أكيد كداب كبير وضلالى............لكن برضه هو حاسب حسابه ..... مظبط أموره مع البندر....ولامم الواغش عن البلد ........... وأهى ماشية بستر ربنا

رد كبير من الكبارات وقاله:
ولما هو حرامى وضلالى وكداب أحنا كنا ساكتن عليه ليه ياأبا الحاج.........ولو سكتنا السنين دى كلتها........مش مصدقين ليه أن ربنا زال عنا الغمة وفرجه قرب وكل واحد فى البلد يشوف حاله اللى راح منه .......

رد عليه واحد تالت وقال :
وفكرك عصابته ح تسيبنا...........الغفر بتوعه اللى واكلين خير البلد مع شوية الأعيان ح يسيبونا نقوم ونفوق ............ ده ظابط النقطة قريبه شغال فينا طحن.........ولما ح يموت......ح يزود الطحن علشان يلبسنا كلنا الطرح

رد الكبير عليه:
كل ده ومش مصدق انه مات...........ولساك بتقول لما ح يموت
والله الراجل ده عمل فينا عمايل لدرجة اننا مابقيناش مصدقين أنه بشر وح يموت ...

فى وسط القعدة مر عليهم شيخ الجامع..........
راجل قليل الحجم بذقن صغيرة....... من كان يعبد الله فالله حى لا يموت ومن كان يعبد مبروك........... فمبروك قاعد على قلبوكم ومماتش يابلد عايزة الحرق ............

الشيخ الزفتاوى...........شيخ أزهرى..جه من بلد جنبهم من زمان بعد ماخد العالمية من الأزهر.......... لكنه باع دينه لمبروك ........وقبض التمن .......

ماحدش بص له أصلاً كله مصمص شفايفه زى الولايا وسكتوا ......... من كبيرهم لصغيرهم .......

ها يابا الحاج.......ح نعمل أيه دلوقتى........ح نسيبهم يورثونا زى البهايم ولا ح نحس على دمنا ونقوم نشوف مصالحنا اللى كان مبروك الله يجحمه مطرح ماهو راح موقفها ..........

أخرس ياياد يابن.......ماهو مابقاش إلا العيال اللى يتكلموا وسط الكبارات ......

شخط الحاج فتوح سعيد فى الواد كرم أبو النور اللى كان عامل فيها فلة من كام سنة وفكر انه ياخد العمودية من مبروك ..........
قام مبروك بيعه اللى وراه واللى قدامه وخلى العيال تزفه فى البلد وهو مركبه الحمار بالمقلوب....... بعد ما قضى له شهر فى النقطة كان عادل محبوب ظابط النقطة معلقه فيهم من رجليه وبيجلد فيه طول النهار والليل............ .لما طلع من النقطة مكسح ..........

جرى أيه يابلد عايزة يتولع فيها بجاز وسخ...........ملمومين كدة ليه شخط فيهم شيخ الغفر أول ما وصل ..........أيه عالم ياسو
فاكرين أبا الحاج مبروك مات ............ ..هع هع هع هع
لا أطمنوا.........ده قاعد على قلوبكم لسة............ .....وأديه أهو ماشى فى الغيط بشوف محصوله............ نقبكم على فاشوش
هش هش هش............على بيتكم يابهايم

:شكراً:

ما هو طلع مش مات

ويا عينى الواد الفقى العبيط اهوه محبوس عشان زاع الخبر !!!

ما تفوقوا بقى يا بلد

لنلاقى نفسنا قاعدين على مسطبه بنندب حظنا وبنقول مين اللى هيجى يكمل مسيرة حسنين مبروك

ما احنا خدنا على اللى يقهرنا ويظلمنا

ونصقفلوا كمان ونقول اخترناك اخترناك

ويقعد على قلبنا كم عشرين سنة

وهيجى من صلبه يكمل مسيرته ...ما احنا خدنا على الظلم وبردو فرحانين وساكتين

ما تفوقوا بقى يا بلد ....ابا العمدة مش مات و هش هش كل واحد على داره

يا رااااااااااااااجل

ما هى كلها بطيخ

مش هتفرق من عمدة كفر البطيخ لعمدة بلد البطيخ

اهو كله بطيخ فى بطيخ

واوعة وشك

اين الديمقراطية ؟؟؟؟؟؟

وحرية الرأى

والرأى والرأى الاخر

والحقيقة

وودونا فى داهية بقى