طبعا حضراتكم شايفين الصورة دى
اولا الصورة دى حقيقة مش من فيلم او مسلسل ودى عبارة عن حادث مرورى بين سيارتين فى اشارة فى اليابان
انا طبعا شوفت الموضوع بتاع عهود بتاع البحر الصناعى اللى فى اليابان وبما انى انا بشتغل فى شركة يابانية فحبيت ان اوريكو الفرق بينا وبينهم وان ازاى هما قدروا يعملوا بحر صناعى واحنا هنا بنعمل بحور مجارى صناعية فى الشوارع
بصوا اولا شوفوا الشارع شكلة عامل ازاى والاسفلت شكلة بجد انضف من طاسة تيفال بنقلى فيها البيض
غير كدة بقى شوفوا ان ازاى الحادثة حصلت من الواضح انها فى النهار ومفيش حد من الاخوة الحشريين واقف يحكم على مين الغلطان ويخليه يدفع للتانى
وواضح هدوء كل من طرفى الحادثة الراجل واقف فى هدوء لا ينظر الى السيدة تقريبا حتى لا يجرح مشاعرها وهى تنظر تقريبا الى حجم الخسائر
ومن الواضح ان الراجل كان لسة قافل مكالمة تليفون محمول تقربيا اما بالشرطة او بالعمل علشان يقول انه هيتأخر شوية
طبعا بقى انا عايز نقلب الصورة ونبعد حوالى 14 ساعة طيران من طوكيو الى القاهرة وننظر لو الحادثة دى حصلت مثلا ولتكن فى شارع رمسيس
الراجل : يا بنت ال................... مش تفتحى يا بنت .......................
الست : اهو انت اللى ابن ......................
الست : انت متعرفش انا مين ياابن
الست : بابا الحقنى واحد خبط العربية بتاعى وعمال يشتمنى
بابا : متزعليش يا حبيبيتى انا هبعتلك عمو مأمور القسم يأدبة ويعرفة مقامه
وطبعا الناس كلها هتتلم وكل واحد يعمل فيها الخواجة هوندا ويفصل مين الغلطان والمرور يقف والناس مترحش شغلها
وامين الشرطة يجى ياخد سبوبه من الاتنين
ولما يجى عمو المأمور يخد البنت فى عربيتة ويخلى الامين يسوق العربية لحد البيت وطبعا التانى يكون هو كمان اتصل بخالوا سيادته العميد :فلان الفلانى
وسيادته يتصل بسيادته والمواضوع يبقى كوسة خالص
وطبعا ده لما يكون الحاثة بين اتنين من علة القوم
اما بقى لو بين سواق تاكسى وسواق ميكروباص او اتوبيس نقل عام او ..........او............
كان الوضع هيبقى اسواء من كدة بكتير
شوفتم بقى الفرق بينا وبينهم هما ناس محترمين واحنا ..............
هما كل واحد بيحترم ادمية الاخر
وطبعا احنا عارفين عندنا الوضع عامل ازاى
ولفكرة الشخصية اليابانية ممكن يكون اساسا بيكرهك لكن ديما على طول يبتسم ويلقى التحية مش علشان هو خبيث
لأ علشان هو ده الاسلوب اللى لازم الناس تتعامل بيه حتى لو بيكرهوه بعض
انا المدير بتاعى اليابانى لقيته فى مرة بيضحك اوى سألته ليه ببتضحك كده
قالى ايه ده
فبصيت لقيت توك توك فقالته ده اسمه توك توك وسيله نقل صغيرة بين المناطق القريبة الشعبية
قالى الاختراع ده كان عندنا من اكتر من 40 سنه
ياااااااااااااااااااااااااااااااااااااااااااااااااااااااااااااااااااا
يعنى الفرق بينا وبينهم اكتر من اربعين سنه
وعلشان نختصر الاربيعن سنة دى لازم نتخلص من كل العادات السيئة اللى فينا والكوسة اللى عندنا
من اربيعن سنة كنا احنا فوق وهما كانوا لسة مفقوش من القنبلة النوويه
دلوقتى احنا فين وهما فيييييييييييييييييييييييييييييييييييييييييين
احنا دلوقت لسة مفقناش من القنبلة اللاخلاقية اللى انضربنا بيها
يارب نفوق ونكون ربع الناس دى فى الاحترام بس مش اكتر
الرئيسية 
