لما المسخرة توصل بيتنا مستحيل أسكت ، لا للإنحراف في بيتنا

يوم من الايام اثناء وجودي في بيتنا شائت الاقدار انى احضر واشوف المهزلة دي علشان اضع لها حد وتكون قصة وعبرة لمن يعتبر

بينما انا قاعد ومستمتع بالفرجة علي فيلم كارتون حدث امر لم يخطر علي بالي في افظع الكوابيس

سمعت اصوات غريبة وحسيت بحركة في الصالة ، بكل قلق الدنيا قمت علشان استكشف

خرجت لقيت كل الاوضاع مستتبة والمنطقة المحيطة بالصالة يغلفها جو من الهدوء

لكني حدسي كخبير في الامور الخارجة عن استيعاب العقل البشري كنت متاكد من وجود شئ غريب

فقررت اني اثبت واستخبي لحد ما اعرف ايه بالظبط اللي بيحصل

فجأة لقيت صرصارين طالعين من تحت الكنبة بيجروا ورا بعض ..

من شكلهم كده تقول انهم اتنين بيحبوا بعض ..

شبه الشباب والبنات اللي عندنا أما بيخرجوا مع بعض..

نفس المرح والبراءة!

لكن أنا بما اني حاقد عليهم بقي ..

كان لازم أحط حد للمسخرة دي!!

أصل بيتنا مش شقة مفروشة يعني!!!

وفعلا جبت المبيد .. ورشيته ..

وفعلا حركتهم اتجننت ..

وقعدوا يلفوا ويجروا بفزع وفجأه ..

اتقلبت الصرصارة .. وقعدت ترفس برجلها.. رفسة الموت !

ولقيت الصرصار بتاعها واقف جنبها ثابت في مكانه مصدوم ولحظات صمت رهيبة سادت المكان !!

بس شنباته كانت بتتحرك..

أكيد كان بيقولها متسيسبنيش يا حبيبتي ..

أو بيقولها استحملي عشان حبنا وكانت هيا حركات شنباتها برضه ( مش عارف ازاي عندها شنبات) بتقول ده قدرنا يا حبيبي أو مسيرك تنساني ..

أو يمكن بتقوله.. (سي حمدي خلي بالك من العيال)!

المهم بعد ماماتت خالص.. لقيته بقه التفت لي .. وفي عينة نظرة غضب عارمة ..

ده الانتقام أكيد , اكيد دلوقتي هيطلع سكينة عشان يقتلني .. ولما هيلاقيني كبير عليه .. هيموت نفسه ويخلص!..

وقعد يقرب مني بخطوات ثقيلة ..

وأنا من قوة موقفه وثباته و هالة اليأس المحيطة بيه مقدرتش اتحرك!

وفجأة وانا عمال اتراجع .. لقيت ورايا الحيطة!

وهو بيقرب..

دي النهاية!! ..

هيعمل ايه ؟

ممكن ييجي يدوس عليا بشبشبة؟

صعبة أصله مش لابس شبشب ..

ولا يمكن يجي لغاية عندي يبص لي بكل تحدي ويبص لي من فوق لتحت و يتف عليا ويمشي؟

احتمال!

لكن عقبال ما وصلي.. كان المبيد لعب لعبته القذرة في جهازة العصبي.. ووقع ..

وقعد يرفس رفسة الموت البطيئة لغاية أما توقف خالص.. ونظراته بتقولي.. مش هاسيبك غير لما انتقم لحبنا الل قتلته!!

المهم ..

انتهى الموضوع .. وقتلت بإيدي روميو وجوليت ..

حبيت أقوله في الجنة ان شاء الله ..

ده طبعا لو كان ناوي يتجوزها مش يغدر بيها زي شباب اليومين دول ..

أو احتمال انهم قرفانين من اهلها و أهله فا جم هنا!

حقهم .. بس برضة أحنا مرحناش زاحمناهم في البلاعات .. عشان يزاحمونا في بيوتنا!

اسيبكم بقي واروح اكمل فيلم الكارتون

:123:

انت قلبك آسى ....اوى اوى

انت مش بتحس....كده وكده

كده يا هادم الملذات

حرام عليك تفرق بين حبيبين

ترضا حد يعمل فيك كده و انت بتجرى وتلعب وتهظر انت وحبيبتك

:(