بيحبني
ما بيحبنيش
بيحبني
ما بيحبنيش
بيحبني
ما بيحبنيش
بيحبني
ما بيحبنـ.... ايه ؟
ما بيحبنيش ايه ؟ لا لا أكيد بيحبني , دي الوردة هي اللي ناقصه ورقة , قال ما بيحبنيش قال , لا لا , ده بيحبني , أنا متأكده ... آآآ آه آه بيحبني !!!
للأسف البنت دي و غيرها كتير و حتى الأولاد , عاوزين يقنعوا نفسهم بأي طريقة إن لعب العيال اللي هم فيه ده اسمه حب بجد , و بصراحة ليهم العذر .
البنات معظمهم لما يلاقول حاجة "يشبطوا" فيها و أما يصدقوا , تبقى الواحدة من دول بتكدب و تصدق نفسها ان "روميو" بيحبها و ما يقدرش يستغنى عنها
و الأولاد على قسمين , قسم برضه بيحب و عايش و مش عايش و مش قادر على بعد "جوليت" و انها ما فيش ويها أدب و أخلاق و احترام
و قسم تاني بيقضي وقت أو بيتحدى زمايله أو حاجة تالته ,
المهم احنا لينا بالقسمين الأولين بس ,
"الحَبِّيبَة"
اللي بيدوروا على أي يحد يقول لهم "بحبك" و بيصدقوا أي حد يقولها لهم ,
ستيفن كوفي -الراجل المشهور بتاع كتاب العادات السبع- عامل كتاب اسمه :
To Live, To Love and To Leave a Legacy
الكتاب بيتكلم عن الحاجات أو الأولويات اللي من غيرها ما نقدرش نبقى ناجحين ,
و هي بالترتيب زي ما قال
نعيش
نحب
نترك أثراً
و هو ده فعلا اللي ملخبط حياتنا ,
لأن الواقع اللي احنا بنعيشه متلخبط شوية , احنا :
بنعيش
بنحب و نتحب شوية من الأسرة و بعد كده بنبقى خلاص , كبرنا و ما بقيناش عيال , ما فيش بوس و لا حضن و لا دلع -على الوالدين طبعا- و لا أي حاجة من بتاعة أيام الطفولة دي ,
و الثالثة اننا بندور على شغل و خلاص , و مش عاوزين نسيب أثر و لا "دياولوا" , أنا عاوز أعيش و خلاص , اياكش تولع ,
و الخلل بالتحديد -في رأيي طبعا- في "البتاعة" التانية دي,
أول ما الواد من دول يدخل سن المراهقة و يطلع له "شنب في وشه" , يبقى خلاص راجل , و تلاقي -مش عارف ليه- الأهل بيعاملوه لا على انه راجل و لا على انه طفل -و البنات طبعا-
كما في كتاب "المراهقة أمل و ألم" : " وقد يعتري المراهق حالات من اليأس والحزن والألم التي لا يعرف لها سبباً، ونفسيا يبدأ بالتحرر من سلطة الوالدين ليشعر بالاستقلالية والاعتماد على النفس، وبناء المسؤولية الاجتماعية، وهو في الوقت نفسه لا يستطيع أن يبتعد عن الوالدين؛ لأنهم مصدر الأمن والطمأنينة ومنبع الجانب المادي لديه، وهذا التعارض بين الحاجة إلى الاستقلال والتحرر والحاجة إلى الاعتماد على الوالدين، وعدم فهم الأهل لطبيعة المرحلة وكيفية التعامل مع سلوكيات المراهق، وهذه التغيرات تجعل المراهق طريد مجتمع الكبار والصغار، إذا تصرف كطفل سخر منه الكبار، وإذا تصرف كرجل انتقده الرجال، مما يؤدي إلى خلخلة التوازن النفسي للمراهق، ويزيد من حدة المرحلة ومشاكلها. "
فالطبيعي إن "كل شاب و كل فتاه" -على رأي اللمبي- هيدور خارج البيت اللي "سلب منه فجأة" الحب و الحنان اللي كان متعود عليهم -أو اللي ما أخدهمش من الأول- , و يدور عليهم خارج البيت ,
و بره البيت زي ما الكل عارف يا الدروس أو الشارع لو في ثانوية عامة
أو في الكلية زي الأغلبية
و للأسف افتقاد الحب داخل الأسرة ده بيخلي المراهق -على فكرة فترة المراهقة تبدأ من 11أو 14 سنة إلى 21 سنة !!! - يتقبل أي حب أو "عطف" خارجي بدون تفكير أو تمييز "أما صدق يلاقي حد بيهتم بيه"
علشان كدة معظم العلاقات بين الولاد و البنات في فترة الجامعة و ما قبلها غالبا ما تنتهي نهاية فاشلة -و دي أحسن الفروض- ,
فيه جانب آخر "للحوار" ده و هو الصداقة , يعني ولا د بولاد و بنات ببنات ,
و ده متهيأ لي مكن يكون أخطر من الأول لأن ما عليهوش قيود اجتماعية زي الأول -أو دينية برضه , بس بقت مهملة دلوقتي , لو حاجة حرام لكن مش عيب , بتتعمل عادي !! -
تلاقي الولد مثلا -أو البنت- لاقى شلة "تعبره" و يبقى فرد منها ,
حد يمشي معاه و خلاص و يشاركه بدل الوحده بره البيت و "عدم التعبير" و التجاهل داخل البيت
و الله أعلم بقى الشلة دي ظروفها ايه ؟ سجاير و بانجو و بنات و زي ما تحب ,
أو على النقيض , تلاقيه اتجه للتدين أو العمل السياسي و انخرط فيه بشدة و تطرف , أهو برضه لاقي حد يمشي معاه و يتقاسمه الأفكار ,
عارف لما تقابل واحد مرة و تتعرف عليه على الماشي كدة
و تقابلة مرة تانية و انت مش حاطه في دماغك و تلاقيه فاكر اسمك و انت في كلية ايه و فاكرك كويس ؟؟
أكيد بتحس بحاجة مختلفة تجاهه , أكيد بتحبه و بتحب تعرفه و تعرف عنه أكتر و بتتعلق بيه ,
ليــــــــــــــــــــــــــــــه ؟
لأنه "عطف" عليك , مش ادالك حسنة , لا , لكن حسسك انك مهم بالنسبة له ,
احنا كلنا كده , نفسنا حد يعطف علينا و يحبنا و نحبه , و ده طبعا طبيعي جدا كبشر,
إنما اللي مش طبيعي إننا نلاقي الحب و العطف ده مع أشخاص غلط , في أوقات غلط , و بأشكال غلط ,
و للأسف اللي المفروض يدولنا الحب ده , شايفينه دلع أو ضعف أو كلام فاضي , أو عيب ما يصحش !!!
أنا ما حطيتش حل لأني أصلا مش حاطط مقالة للمعلومات , إنما فقط ..... فضفضة ,
و يا ريت لو حد عنده حل ..... يقول !!
بالمناسبة , هو "أريد حبا و حنان"ا ده كان فيلم و لا اسم أغنية لأم كلثوم و لا ايه بالضبط ؟؟
الرئيسية 
